इसाई धर्मको ऐतिहासिक सर्वेक्षण

इसाई धर्मको ऐतिहासिक पक्षहरू अध्ययन गर्न हजारौँ वर्षपछाडि फर्केर सृष्टिको समयतिर जानुपर्ने हुन्छ। त्यसको निम्ति स्वर्ग, पृथ्वी, अन्तरिक्ष, तारा, ग्रह, मानिस, जीब-जन्तु र वनस्पतिहरूलाई परमेश्‍वरले कसरी र किन सृष्टि गर्नुभयो भनी बाइबलीय दृष्टिकोणले केलाउनु पर्नेहुन्छ। यो पुस्तकको उद्देश्य बाइबलीय परिप्रेक्ष्यमा इसाई विश्‍वासको (अथवा इसाई धर्मको) ऐतिहासिक सर्वेक्षण गर्नु अनि सृष्टि र सृष्टिकर्ताको सम्बन्धलाई आत्मिकरूपमा व्याख्या गर्नु हो। यो पुस्तकको अर्को पक्ष भनेको इसाई विश्‍वासलाई बुझ्‍न बाइबलीय घटनाहरूलाई भौगोलिक, ऐतिहासिक, सामाजिक, साँस्कृतिक, धार्मिक र राजनैतिकरूपमा विश्‍लेषण गर्न सहायता गर्नु हो।

बाइबलको ६६ वटा पुस्तकहरू ४० भन्दा बढी लेखकहरूले तीन महादेशहरूबाट (एसिया, अफ्रिका र युरोपबाट) १५०० भन्दा बढी समयमा लेखिएका हुन्। फरक स्थान र फरक समयहरूमा कहिल्यै नभेटेका फरक-फरक व्यक्तिहरूले लेखे तापनि बाइबलमा उल्लिखित घटनाहरूमा कालक्रमिकता र उद्देश्यमा एकरूपता छ। यसर्थ, पवित्र आत्माको प्रेरणाद्वारा बाइबल धर्मशास्‍त्र लेखिएको हो भन्‍ने सत्यतालाई दाबी गर्न सकिन्छ। यहाँ स्परणयोग्य तथ्य के छ भने मानव इतिहासमा सबैभन्दा बढी भाषाहरूमा अनुवाद भई सबैभन्दा बढी बिक्री-वितरण हुने पुस्तक बाइबल नै हो। संसारको करिव एक तिहाइ मानिसहरूले इसाई विश्‍वासलाई अँगालेका छन्। यसमा जीवित परमेश्‍वरको अदृश्य शक्तिले पर्दापछाडिबाट काम गरेको स्पष्ट महसुस गर्न सकिन्छ किनभने मानवीय प्रयासमा यसो हुन असम्भव छ!

बाइबलमा दुइ पदहरू ‘आदिमा’ (In the beginning) भन्‍ने शब्‍दबाट सुरु हुँदछन्। “आदिमा परमेश्‍वरले स्वर्गहरू र पृथ्‍वी सृष्टि गर्नुभयो” (उत्‍पत्ति १:१)।  “आदिमा वचन हुनुहुन्‍थ्‍यो, वचन परमेश्‍वरसँग हुनुहुन्‍थ्‍यो, अनि वचन परमेश्‍वर हुनुहुन्‍थ्‍यो” (यूहन्‍ना १:१)। यी खण्डहरूलाई नियाल्दा के स्पष्ट हुन्छ भने त्यतिबेला स्वर्गदूत, मानिस, जीव-जन्तु र वनस्पतिको थिएन। अर्को महत्वपूर्ण कुरा के हो भने उत्‍पत्ति १:१ र यूहन्‍ना १:१ को बीचमा ठूलो अन्‍तर हुनुपर्छ। यूहन्‍ना १:१ को घटना उत्पत्ति १:१ भन्दा निकै पहिले हुनुपर्छ।